Oft gestallte Froen

Wat ass Babbelix?

D'Babbelix Applikatioun gouf entwéckelt fir d'mëndlech Sproochentwécklung duerch Technologie ze erliichteren an ze beräicheren. Si ass souwuel als iOS an Android App verfügbar, awer kann och direkt iwwer de Browser benotzt ginn.

Babbelix erlaabt et de Benotzer laang a komplex Sproochproduktiounen ze kreéieren, andeems individuell Clips opgeholl an zesummegesat ginn. Déi resultéierend Audio-Produktiounen (z.B. Geschichten, Dialoger, Monologer, Héierspiller, Interviewen ...) kënne ganz einfach geännert ginn, andeems Dir eenzel Audioclips beweegt oder läscht.

De Schwéierpunkt läit op enger einfacher an intuitiver Benotzung. Dir fannt verschidde Beispiller a Virschléi an dëser Sammlung.

Wat huet Babbelix gemeinsam mat Tiparlo?

Déi éischt Versioun vum Tiparlo gouf vun EducDesign s.a. am Joer 2006 als Deel vun der OLEFA Plattform publizéiert, a gouf zënterhier kontinuéierlech weider entwéckelt. Si war nëmme verfügbar fir Schoulen an Institutiounen, déi en entspriechende Lizenzkontrakt mat EducDesign s.a. haten.

Zënter Juli 2024 huet de SCRIPT den Tool fir all lëtzebuergesch Grondschoulen als Deel vun enger nationaler Plattform Babbelix zur Verfügung gestallt, mat IAM Login an automateschem Matching tëscht Schülerinnen a Schüler an hiren Enseignanten.

Ausserhalb vun de Grondschoulen zu Lëtzebuerg kann EducDesign s.a den Tool als Tiparlo weider ubidden (z.B. am Kader vun der Demenzpräventioun bei eelere Leit, oder an anere Länner).

Wie ka Babbelix benotzen?

Babbelix ass fir all Schülerinnen, Schüler an Enseignanten an de Lëtzebuerger Grondschoulen disponibel. D’Umeldung gëtt mam IAM gemaach.

Wie kann nei Projeten erstellen?

Souwuel Schüler wéi och Enseignantë kënnen e Projet opmaachen. Wann d'Schülerinnen a Schüler e Projet erstellen, gëtt en automatesch un hir Klass zougewisen. D'Enseignante vun dëser Klass kréien och Zougangs- a Beaarbechtungsrechter zu dësem Projet. (Wa Schülerinnen oder Schüler gläichzäiteg an e puer Klassen ugemellt sinn, z.B. an enger "classe d'accueil" an an enger regulärer Klass, musse si eng vun dëse Klassen auswielen, wann e Projet erstallt gëtt.) D'Schülerinnen a Schüler kënne weder d'Projeten ëffentlech setzen, nach aner Schüler fir d'Matschaffe bäisetzen; allerdéngs hunn d'Enseignanten déi entspriechend Rechter.

Ass et méiglech datt verschidde Leit gläichzäiteg un engem kollaborative Babbelix Projet schaffen?

Babbelix ass grondsätzlech entwéckelt ginn, fir un engem gemeinsame Projet ze schaffen. Dëst bedeit, datt Dir um selwechte Projet op verschiddenen Apparater zur selwechter Zäit schaffe kënnt, an d'Ännerunge ginn op all eenzel Geräter live visualiséiert.

Allerdéngs kënnen nëmmen Enseignanten e Projet erstellen, sou datt e puer vun hire Schüler, oder souguer ganz Klassen aus hirer Schoul, Zougrëffs- oder Beaarbechtungsrechter kréien. D’Enseignantë kënnen och duerno d’Rechter fir Projeten, déi vun de Schüler selwer erstallt goufen, deementspriechend upassen.

D'Enseignante ginn encouragéiert, en A op Projeten ze halen, déi se deementspriechend gesat hunn, fir ze vermeiden, datt d'Schüler op onpassend Manéier an enger Zesummenaarbecht interagéieren (z.B. Mobbing).

Kënnen och Projeten esou gesat ginn, datt se ouni Login ëffentlech zougänglech sinn?

Jo, awer nëmmen Enseignantë kënnen e Projet deementspriechend opsetzen. Dat kann zum Beispill nëtzlech sinn, fir engem Public grouss gemeinsam Produktiounen ze presentéieren, z.B. Héierspiller vun der Klass, Interviewe mat externe Gäscht, Reportagen... Esou Projete kënnen dann, zum Beispill, och op enger Schoul-Websäit verlinkt ginn.

Hei sinn e puer Richtlinnen a Empfeelunge fir Enseignanten, déi e Projet ëffentlech maache wëllen:
  • Kontrolléiert, datt de Projet esou anonym wéi méiglech ass (benennt d'Symboler op den eenzelne Audioclips net no perséinlechen Nimm, an evitéiert Inhalter mat perséinlechen Informatiounen, wéi Adressen oder Gebuertsdeeg). Drot Iech selwer als Besëtzer vum Projet an, an net ee vun de Schüler.
  • Setzt d'Rechter esou, datt d'Schülerinnen a Schüler keng Beaarbechtungsrechter fir de Projet méi hunn. Dëst verhënnert all nodréiglech Ännerungen vum Projet, deen Dir kontrolléiert an ofgeseent hutt, no senger Verëffentlechung.
  • Frot d'Elteren ëm Erlabnis (cf Consentement enregistrement voix).
Dir hutt och d'Méiglechkeet de Projet als MP3-Datei ze exportéieren an dann op eng aner Websäit eropzelueden.

Kënnen d'Schülerinnen a Schüler och Babbelix benotzen, wann d'Applikatioun net an hirer Klass benotzt gëtt?

Jo, dëst ass méiglech. Si kënnen hir eege Projete fir sech selwer kreéieren an zum Beispill komplex Erzielungen oder Dialoger opbauen, oder zum Beispill üben, en Text haart virzeliesen. Mee wéi an de Froe virdrun erkläert, kënne si dann net mat anere Schülerinnen a Schüler u gemeinsame Projeten zesummeschaffen oder hir Projete verëffentlechen, well dës Optioune fir d'Enseignantë reservéiert sinn. (D'Schülerinnen a Schüler kënnen awer en MP3-Export vun hirem Projet erstellen an eroflueden.)

Wat geschitt mat existente Projete beim Wiessel vum Schouljoer?

Babbelix ass gutt gëeegent fir Léierfortschrëtter an Entwécklungen iwwert eng länger Zäit ze dokumentéieren. Fir dës Grondiddi ginn d'Projeten net automatesch geläscht wann d'Schouljoer ännert.

Et ginn awer zu deem Zäitpunkt e puer automatesch Upassunge fir Zougangs- a Beaarbechtungsrechter duerchgefouert:
  • All Gruppenanträg (z.B. Membere vun der "Klass X" dierfen dëse Projet liesen) ginn an Eenzelanträg baséierend op der aler Grupp ëmgewandelt. (Schülerin 1, Schüler 2, Schüler 3… dierfen dëse Projet liesen), well sech d'Gruppe beim Joreswiessel staark verännere kënnen (an der Klass X kënnen nom Wiessel deelweis oder ganz aner Schülerinnen a Schüler sinn). Domadder gëtt verhënnert, datt déi nei Schülerinnen a Schüler vun der Klass automatesch Zougang zu engem Projet vum Joer virdru kréie géifen.
  • D’Schülerinnen a Schüler behalen d’Liesrecht op hire fréiere Projeten, fir datt si se weiderhin lauschtere kënnen a se an hirem Portfolio bleiwen,ausser den Enseignant géif de Projet läschen. Zum Schluss vum Joer gëtt de Schülerinnen a Schüler d'Recht op Beaarbechtung awer entzunn. Dëst ass fir ze vermeiden (besonnesch am Fall vu kollaborative Projeten), datt si weider kënnen zesummen u Projete schaffen, déi net méi vun den Enseignantë kontrolléiert ginn. Wann de Projet awer am nächste Schouljoer weidergeet, kënnen d'Enseignanten hinnen hir Rechter zréckginn.

Wat geschitt wa Schülerinnen a Schüler oder Enseignanten d'Grondschoul oder de Lëtzebuerger Schoulsystem verloossen?

Well de Login iwwer den IAM stattfënnt an och speziell mat der Gruppelogik vun de Grondschoulsklasse schafft (z.B. fir d'Affiliatioun tëscht Schülerinnen a Schüler, Enseignanten, Klassen a Schoulgebaier ze bestëmmen), ass et fir Schüler, déi aus der Grondschoul an de Lycée komm sinn oder net méi am lëtzebuergesche Schoulsystem sinn, net méi méiglech, sech bei Babbelix unzemellen. Domat hu si och keen Zougang méi zu hire Projeten (ausser deenen, déi d'Enseignantë fir onregistréiert Gäscht publizéiert hunn). Aus dësem Grond recommandéiere mir fir d'Projeten, déi ee fir spéider behale wëll, kuerz virdrun een MP3-Export ze maachen.
Dat selwecht gëllt och fir Enseignanten, déi net méi an enger lëtzebuergescher Grondschoul schaffen.